Category Archives: கிறிஸ்தவர்கள்

திடுக்கிடும் தகவல்: உமர் ஒரு கிறிஸ்தவர் அல்ல! முஸ்லீம்கள் கண்டுபிடிப்பு

திடுக்கிடும் தகவல்: உமர் ஒரு கிறிஸ்தவர் அல்ல! முஸ்லீம்கள் கண்டுபிடிப்பு

இஸ்லாமியர்கள் அங்கே இங்கே சுற்றி கடைசியாக, என் தலையிலேயே கையை வைத்துள்ளார்கள்.

அதாவது, கிறிஸ்தவர்கள் எழுதும் கட்டுரையை முஸ்லீம்கள் படிக்கவைக்கக்கூடாது என்பதற்காக, "இவர்கள் அவதூறு செய்கிறார்கள்" என்று சொல்லிக்கொண்டு இருந்தவர்கள், இப்போது கிறிஸ்தவர்களும் எங்கள் கட்டுரைகளை படிக்கக்கூடாது என்பதற்காக பல பொய் மூட்டைகளை அவிழ்த்து விட்டுள்ளார்கள்.

இப்படி "உமர் கிறிஸ்தவர் அல்ல" என்று சொன்னவரே, தன் பெயரை வெளியே சொல்லாமல், Anonymous ஸாக எழுதிய பின்னூட்டம் தான் வேடிக்கையிலும் வேடிக்கை.

இந்த கட்டுரையை அவர் கண்டவுடன் அந்த Anonymousவுடைய உண்மையான பெயர் வெளியிடுவார்கள். சரி போகட்டும், அவர் என்ன சொன்னார் என்பதை படியுங்கள்.

Quote:

========================

At 5:05 PM, Anonymous said…

நீங்க இப்படி சொல்றீங்க. ஆனா அவர் உன்மையில் கிறிஸ்தவர்தானா என்பதில்பலருக்கு சந்தேகம் இருக்கு. அவர் முஸ்லீமைப்பற்றி எழுகிறேன் என்றப் பெயரில் கிறிஸ்தவர்களை கேவலப்படுத்திக்கொண்டிருக்கின்றார் என்று ஏராளமானக் கிறிஸ்தவர்கள் பேசிக்கொள்வதாக எனது நண்பர்கள் சொல்லிக்கொண்டிருக்கின்றனர். ஒற்றுமையாக இருந்த தமிழ் கிறிஸ்தவர்களையும் – முஸ்லீம்களையும் பிரித்தாளும் சூழ்ச்சி இது என்றும் அந்த செயல்களில் ஈடுபடுவர்கள் சில ஆதிக்க சக்திகள் என்றும் செய்திகள் வந்த வன்னம் உள்ளன. இந்த உன்மையை அறியாமல் தான் சில கிறிஸ்தவ இனையங்களே இவர்களின் சூழ்ச்சி தெரியாமல் பலியாகிக்கொண்டிருக்பதாக நம்பத்தகுந்த செய்திகள் வந்துக்கொண்டுள்ளது. விரைவில் சில உண்மைகள் வெளிவரும் என்று எதிர்ப்பார்ப்போம்.

Source: http://egathuvam.blogspot.com/2008/03/blog-post_19.html
========================

இவர் சொல்லும் விவரங்கள், சரியானதா என்பதை இது வரை என் கட்டுரைகளை படிப்பவர்களே முடிவு செய்யட்டும்.

அவர் முன்வைத்த சந்தேகங்கள்:

=====================
1. அவர்(உமர்) உன்மையில் கிறிஸ்தவர்தானா என்பதில் பலருக்கு சந்தேகம் இருக்கு.

2. அவர் முஸ்லீமைப்பற்றி எழுகிறேன் என்றப் பெயரில் கிறிஸ்தவர்களை கேவலப்படுத்திக்கொண்டிருக்கின்றார் என்று ஏராளமானக் கிறிஸ்தவர்கள் பேசிக்கொள்வதாக எனது நண்பர்கள் சொல்லிக்கொண்டிருக்கின்றனர்.

3. அந்த செயல்களில் ஈடுபடுவர்கள் சில ஆதிக்க சக்திகள் என்றும் செய்திகள் வந்த வன்னம் உள்ளன.

4. இந்த உன்மையை அறியாமல் தான் சில கிறிஸ்தவ இனையங்களே இவர்களின் சூழ்ச்சி தெரியாமல் பலியாகிக்கொண்டிருக்பதாக நம்பத்தகுந்த செய்திகள் வந்துக்கொண்டுள்ளது

(இந்த வரிகளில் உள்ள சில எழுத்துப்பிழைகள், இந்த விவரத்தை சொன்னவருடையது)
=====================

என் பதில்:

Quote by Anonymous : 1. அவர்(உமர்) உன்மையில் கிறிஸ்தவர்தானா என்பதில் பலருக்கு சந்தேகம் இருக்கு.

நான் எழுதும் கட்டுரைகள் அனைத்தையும் படிப்பவருக்கு இந்த சந்தேகம் வராது. அந்த "பலர்" யாருங்க? முஸ்லீம்களா அல்லது கிறிஸ்தவர்களா?

Quote by Anonymous : 2. அவர் முஸ்லீமைப்பற்றி எழுகிறேன் என்றப் பெயரில் கிறிஸ்தவர்களை கேவலப்படுத்திக் கொண்டிருக்கின்றார் என்று ஏராளமானக் கிறிஸ்தவர்கள் பேசிக்கொள்வதாக எனது நண்பர்கள் சொல்லிக்கொண்டிருக்கின்றனர்.

ஒகோ, அப்போ நீங்க மூன்றாவது ஆளு. உங்க நண்பருக்கு கிறிஸ்தவர்கள் தெரிந்து இருப்பதைப் பற்றி மிக்க மகிழ்ச்சி. கிறிஸ்தவர்களை நான் கேவலப்படுத்தவில்லை சகோதரனே, உங்களைப்போன்ற இஸ்லாமியர்கள் எழுதும் பொய்யான தகவல்களுக்கு என்னால் இயன்ற பதில் கொடுத்துக்கொண்டு இருக்கிறேன். கிறிஸ்தவர்களை யார் கேவலப்படுத்திக்கொண்டு இருக்கிறார்கள் என்பதை உங்கள் கட்டுரைகளையும் என் கட்டுரைகளையும் படிப்பவர்களுக்கு நன்றாக புரியும். இயேசுவையும் அவரது தெய்வீகத்தையும் கேவலப்படுத்துகிறவர்கள் நீங்களா அல்லது நானா என்பது எல்லா கிறிஸ்தவர்களுக்குத் தெரியும்.

Quote by Anonymous : 3. அந்த செயல்களில் ஈடுபடுவர்கள் சில ஆதிக்க சக்திகள் என்றும் செய்திகள் வந்த வன்னம் உள்ளன.

இதற்கு முன்பாக ஏதாவது அரசியல் கட்சியில் இருந்தீர்களா! அரசியல் வாதி போல அறிக்கைகளை வெளியிடுகிறீர்கள். அன்பான சகோதரனே, நான் ஆதிக்க சக்தியும் இல்லை, இது என் யுக்தியும் இல்லை. யார் அய்யா உங்களுக்கு அந்த நம்பத்தகுந்த‌ செய்திகளை சொல்வது. அது சரி, கிறிஸ்தவன் இல்லாதவன் ஏன் கிறிஸ்தவத்திற்கு எதிராக முன்வைக்கும் கேள்விகளுக்கு பதில் சொல்லப்போகிறான். பேசுங்க பேசுங்க பேசிக்கிட்டே இருங்க "சம்மந்தமில்லாமல்".

Quote by Anonymous : 4. இந்த உன்மையை அறியாமல் தான் சில கிறிஸ்தவ இனையங்களே இவர்களின் சூழ்ச்சி தெரியாமல் பலியாகிக்கொண்டிருக்பதாக நம்பத்தகுந்த செய்திகள் வந்துக்கொண்டுள்ளது.

எல்லாரும் நன்றாக கவனியுங்கள், "நம்பத்தகுந்த செய்திகள்" இவருக்கு வந்துக்கொண்டு இருக்கிறதாம். எந்த உளவுத்துரையிலிருந்து உங்களுக்கு நம்பத்தகுந்த செய்திகள் வந்துக்கொண்டு இருக்கிறது. சூழ்ச்சி செய்வதில் சிறந்தவன் நானல்ல, அது யார் என்று உங்களுக்கே தெரியும் என்று நினைக்கிறேன்.

அவர் எழுதிய இந்த வரிகளை நான் படிக்கும் போது, எனக்கு ஒரு நிகழ்ச்சி நியாபகம் வருகிறது. அதாவது, ஏவாள் தனித்து இருக்கும் போது, சாத்தான் வந்து "தேவன் உனக்கு ஏதாவது மரத்தின் கனியை புசிக்கக்கூடாது என்றுச் சொன்னாரா?" என்ற சந்தேகத்தை கேட்டது போல, இந்த இஸ்லாமிய நண்பர், "உமர் கிறிஸ்தவனா?" என்று கிறிஸ்தவர்கள் சந்தேகிக்கும் படி செய்யலாம் என்று கனவு காண்கிறார்.

முடிவாக நான் சொல்லிக்கொள்ள விரும்புவது இது தான்:

1. "உண்மை இஸ்லாம்" என்றால் என்ன என்பதை இப்போது தான் தமிழ் கிறிஸ்தவர்கள்(முஸ்லீம்கள் கூட) தெரிந்துக்கொண்டு இருக்கிறார்கள்.
2. என் கட்டுரைகளை கிறிஸ்தவர்கள் படிக்கக்கூடாது என்று இப்படியெல்லாம் பொய்யை அவிழ்த்து விடக்கூடாது. கிறிஸ்தவர்கள் என் கட்டுரைகளை படிக்க தவறினாலும், நீங்கள் படிக்கிறீர்கள் அல்லாவா அது போதும் எனக்கு.

 
 

Advertisements

பின்னூட்டமொன்றை இடுக

Filed under இஸ்லாம், உமர், கிறிஸ்தவர்கள், முஸ்லீம்கள்

மதம் மாறிய கிறிஸ்தவர்கள்

ஆயிரக்கணக்கான பழைய இந்துக்கள் மீண்டும் புதிய இந்துக்களாக மாறுவதாக இணையத்தில் உதார்விட்டுவந்த ஒரு சில ஆசாமிகள் பத்திரிக்கை செய்திகண்டு ஆடிப்போயி உள்ளனர் வெறும் 400 பேர் மட்டுமே மாறினார்கள் என்று அறிந்து.

இந்த 400 என்ற எண்ணிக்கை ஒவ்வொரு நாளும் தமிழ் நாட்டில் இந்துக்கள் இயேசுகிறிஸ்துவை ஏற்றுக்கொள்ளும் எண்ணிக்கையில் ஏறக்குறைய ஐந்தில் ஒரு பாகம் என்பது மறைவன கணக்கு.


இதற்கு தொடர்புள்ள இன்னொரு பதிவு:http://thamilislam.blogspot.com/2008/04/blog-post_8230.html

பின்னூட்டமொன்றை இடுக

Filed under 400 பேர், கிறிஸ்தவர்கள்

மதம் மாறும் எறையூர் வன்னியர்களுக்கு வழியனுப்பு விழா கோலாகலம்

இந்து மதத்தில் சாதிப்பாகுபாடு இருக்கிறது .சரி! .கத்தோலிக்க கிறிஸ்தவராக மதம் மாறிய பிறகு மட்டும் என்ன வாழுதாம் ? அங்கேயும் தானே சாதி பாகுபாடு இருக்கிறது .அங்கேயும் சில இடங்களில் தலித் கிறிஸ்தவர்கள் ஆதிக்க சாதியினரால் ஒதுக்கி வைக்கப்படுகின்றரே என்ற கேள்வி எழுப்பப்படுகிறது .இதற்கு பதில் சொல்லும் சில கத்தோல்லிக்கர்கள் ,இது கத்தோலிக்க மதத்தால் கொள்கை அடிப்படையில் ,கோட்பாடு படி அங்கீகரிக்கப்படவில்லை .திருச்சபை இதை ஒரு போதும் அதிகாரபூர்வமாக அங்கீகரிக்க முடியாது .ஆனால் பன்னெடுங்காலமாக சாதி அமைப்பில் ஊறியவர்கள் கத்தோலிக்கரான பின்னரும் சாதி வேறுபாட்டை நடைமுறையில் கடைபிடிக்கின்றனர் .இது கத்தோலிக்க மதத்தால் அங்கீகரிக்கப்பட்டதல்ல .ஆனால் அதை பின்பற்றுபவர்களின் கோளாறு என்று வாதிடுகிறார்கள்.

என்னைப்பொறுத்தவரை கத்தோலிக்க மதம் வழிபாடுகளில் ,பங்கு நடைமுறைகளில் சாதிப்பாகுபாட்டை அதிகாரபூர்வமாக அங்கீகரிக்க மறுப்பது மட்டுமல்ல ,அந்த விதிமுறை நடைமுறையில் மீறபடும் போது உரிய நடவடிக்கை எடுக்க வேண்டிய பொறுப்பும் திருச்சபைக்கு உள்ளது .எங்கள் சட்டதிட்டங்களில் சாதி பாகுபாடு கிடையாது ,அந்தந்த பகுதியிலுள்ள மக்களின் சில தவறான நடைமுறைகளும் பின்பற்றுதலுமே இதற்கு காரணம் என்று சொல்லி திருச்சபை தப்பித்துக் கொள்ள முடியாது. அது மிகவும் கண்டிக்கத்தக்கது.

விழுப்புரம் மாவட்டம் இறையூர் கிராமத்தில் ஒரே பங்கில் உறுப்பினர்களாக இருக்கும் வன்னிய கிறிஸ்தவர்களுக்கும் ,தலித் கிறிஸ்தவர்களுக்கும் வழிபாடு மற்றும் சில நடைமுறைகளில் பாகுபாடு பல காலமாக இருந்து வந்திருக்கிறது . தலித் கிறிஸ்தவர்கள் இறந்தால் அவர்கள் சவ ஊர்வலம் பொதுப்பாதையில் கொண்டு செல்ல முடியாது .சடலத்தை சுமந்து வரும் வண்டி சமமாக உபயோகப்படுத்தப்படவில்லை .இத்தகைய சாதி வேறுபாடுகள் கடைபிடிக்கப்படுவது இத்தகைய சூழலில் வளராத என்போன்றவர்க்கு அதிர்ச்சியான செய்தியாக இருக்கிறது . கிறிஸ்தவர்களிடையே சாதிப்பாகுபாடு இல்லை என்று நான் சொல்ல வரவில்லை .நான் வளர்ந்த சூழலில் திருமணம் போன்றவற்றில் சாதி இன்னும் இருக்கிறது , சாதி சார்ந்த உள்ளடி வேலைகள், அரசியல் இருகிறது என்றாலும் ,அதை இவ்வளவு வெளிப்படையாக வழிபாட்டு முறைகளிலும் ,நடமுறையிலும் கடைபிடிப்பதை பார்த்ததில்லை . ஆனால் சில இடங்களில் தலித்களுக்கு தனிக்கல்லறைகள் இருப்பதாகவும் ,வெளிப்படையாகவே கோவில்களில் சமத்துவமின்மை கடைபிடிக்கப்படுவதாகவும் வரும் செய்திகள் மிகவும் அவமானத்துக்குரியவை ..கத்தோலிக்க மதம் எந்த காரணத்தைக்கொண்டும் இத்தகைய நடைமுறைகளை தொடர்வதற்கு அங்கீகரிப்பதோ ,அல்லது கண்டுகொள்ளாதிருப்பதோ மிகவும் கண்டிக்கத்தக்கது .

எறையூரைப் பொறுத்தவரை பெரும்பான்மை வன்னியர்கள் தங்கள் பங்கிலுள்ள தலித்துக்களை ஆலய விஷயங்களிலும் சமமாக நடத்த விருப்பவில்லை என்பது கண்கூடு .தாங்கள் சாதி ரீதியாக புறக்கணிக்கப்படுவதாக உணர்ந்த தலித்துக்கள் தனியாக ஒரு கோவிலை கட்டி எழுப்பி அதற்கு மறைமாவட்ட அங்கீகாரத்தை கோரியிருக்கிறார்கள் .தங்களுக்கு தனியாக ஒரு பங்குத்தளத்தை உருவாக்கி தருமாறு கோரியிருக்கிறார்கள் .மறை மாவட்டம் இது வரை அதனை அங்கீகரிக்கவில்லை ..அங்குள்ள வன்னிய கிறிஸ்தவர்களும் அதை எதிர்த்திருக்கிறார்கள். அது இப்போது பூதாகரமான பிரச்சனையாக வெடித்து ,கலவரம் துப்பாக்கிச்சூட்டில் போய் முடிந்திருக்கிறது.

இப்போது மறைமாவட்ட ஆயர் இது குறித்து விடுத்த அறிவிப்பில் தனிப்பங்கு அவசியமில்லை எனவும் ,தொடர்ந்து ஒரே பங்காக செயல்பட வேண்டுமெனவும் ,வழிபாடுகளில் ,கோவில் நடைமுறைகளில் எவ்வித பாகுபாடும் காட்டக்கூடாது எனவும் ,தலித்துகளுக்கு சம உரிமை உண்டு எனவும் அறிவித்திருக்கிறார்.

அதன் பின்னர் தலித் ஒருவர் இறந்து போக அவர் ஆயரின் அறிவிப்பின் அடிப்படையில் வன்னியர்கள் பயன்படுத்தும் சவ வண்டியில் உடலை வைத்து பொது வழியில் கொண்டு சென்று அடக்கம் செய்யப்பட்டிருக்கிறது . அதையும் வன்னியர்கள் சிலர் எதிர்த்திருக்கிறார்கள் .எனவே காவல் துறையின் துணையுடன் இது நடந்திருக்கிறது .இதன் பின்னர் வன்னியர் ஒருவர் இறந்து போக ,தலித்துக்கள் பயன் படுத்தியது என்ற காரணத்திற்காக அந்த சவ வண்டியை உபயோகிக்காமல் தாங்களே தூக்கிச் சென்று அடக்கம் செய்திருக்கிறார்கள் .

இப்போது இதை எந்த கண்ணோட்டத்தில் பார்ப்பது ? வன்னியர்கள் தங்கள் சாதி ஆதிக்கத்தை நிலை நிறுத்த விரும்புகிறார்கள் .இதற்கு திருச்சபையும் அங்கீகரிக்க வேண்டும் என்று விரும்புகிறார்கள் .இதைவிட கேவலம் வேறு எதுவும் இருக்க முடியாது . சரி! சம உரிமை கிடைக்காத தலித்துக்கள் தங்களுக்கென்று ஒரு ஆலயத்தை அமைத்து எங்களை பிரித்து விட்டு விடுங்கள் என கோருகிறார்கள் ..அதையும் வன்னியர்கள் விரும்பவில்லை . தங்கள் சாதி ஆதிக்கத்தை தொடர முடியாது என்பது காரணமாக இருக்கலாம் ..ஆனால் தலித்துக்களின் அந்த கோரிக்கையை மறைமாவட்டம் ஏன் ஏற்றுக்கொள்ளவில்லை ? அங்கீகாரம் வழங்கியிருக்க வேண்டியது தானே ? என்ற கேள்வி எழலாம் .என்னைப் பொறுத்தவரை ஒரு பங்கின் மக்கள் தொகை அதிகரிப்பால் நிர்வாக வசதிக்காக இரண்டாக பிரிக்கலாமே தவிர ,சாதி அடிப்படையில் ,அதுவும் ஆதிக்க சாதித் திமிருக்கு பயந்து ஒடுக்கப்பட்ட மக்கள் பயந்து தனியாக செல்ல வேண்டும் என்று திருச்சபை தீர்ப்பு வழங்க கூடாது .மாறாக எந்த காரணத்தைக்கொண்டும் சாதிப்பாகுபாட்டை அங்கீரரிக்கக்கூடாது என்பது மட்டுமல்ல , கோவிலில் ,வழிபாட்டு முறைகளில் சாதிப் பாகுப்பாகுபாடில்லாத சமத்துவத்தை உறுதி செய்ய வேண்டியது மறைமாவட்டத்தின் கடமை .கொள்கை அடிப்படையில் மறைமாவட்டம் அதைத் தான் செய்திருக்கிறது என்பது மகிழ்ச்சியான விடயம் . ஆனால் நடைமுறையில் அதனை அமல் படுத்த மறைமாவட்ட நிர்வாகம் எந்த அளவுக்கு உறுதியாக இருக்கப் போகிறது என்பதில் தான் அதன் யோக்கியதை தெரிய வரும் .

தொடக்கத்தில் தலித்துக்கள் தாங்கள் புறக்கணிக்கப்படுவதை மறைமாவட்டம் கண்டுகொள்ளவில்லை என்று அதிருப்தி காட்டினார்கள் .ஆனால் மறைமாவட்டத்தின் இந்த அறிவிப்புக்கு பின்னர் வன்னியர்கள் கோபமடைந்து தாங்கள் மதம் மாறப்போவதாக அறிவித்திருக்கிறார்கள் . சன் தொலைக்காட்சியில் இது குறித்து பேசிய ஒரு வன்னியர் சமத்துவம் என்ற பெயரில் காலம் காலமாக தாங்கள் கடைபிடித்து வரும் நடைமுறைகளை எங்களை மாற்ற சொல்லுவது சரியல்ல .. நாங்கள் இந்து மதத்திலிருந்து வந்தவர்கள் தான் .எனவே நாங்கள் அந்த மதத்துக்கே போகிறோம் என்று குறிப்பிட்டார் .

காலம் காலமாக கடைபிடித்து வருவதை மாற்ற விருப்பாவிட்டால் இந்த ஆள் இந்து மதத்திலிருந்து ஏன் கிறிஸ்தவ மதத்துக்கு வர வேண்டும் ? அங்கேயே இருந்திருக்க வேண்டியது தானே ? சரி! இப்போது காலம் காலமாக தாங்கள் கடைபிடித்து வந்த ஏற்றத் தாழ்வையும் , சாதி ஆதிக்கத்தையும் இப்போது கட்டிக்காக்க கிறிஸ்தவ மதம் அனுமதிக்கவில்லையாம் .அதனால் அத்தகைய சுதந்திரத்தை வழங்கக்கூடிய இடத்துக்கு அவர்கள் போகிறார்களாம் .. என்ன ஒரு ஒப்புதல் வாக்குமூலம் ! தயவு செய்து போய் தொலையுங்கள் ஐயா ! உன்னை மாதிரி சாதி வெறிபிடித்தவர்கள் ,மதத்தின் பெயரால் சக கிறிஸ்துவனை சமமாக மதிக்க தெரியாதவனெல்லாம் கிறிஸ்தவ மதத்தை விட்டு போவது தான் உண்மையான சமதர்மத்தை விரும்பும் கிறிஸ்தவர்களுக்கு மகிழ்ச்சியான விஷயம் என்பதை உன்னைப் போன்றவர்கள் புரிந்து கொள்ள வேண்டும் ..உங்கள் ஒப்புதல் வாக்குமூலத்துக்கும் மதமாற்ற முடிவுக்கும் மனமார்ந்த நன்றி!

தெரிந்தோ தெரியாமலோ ஒரு நல்ல விஷயம் நடந்திருக்கிறது .. நடைமுறை ஓட்டைகளையும் ,அந்தந்த பகுதியில் உள்ள சாதி ஆதிக்கத்தையும் சாக்காக வைத்து ஆலயங்களில் வெளிப்படையாக சாதிப் பாகுபாடு பார்க்கும் கிறிஸ்தவர்களுக்கெதிராக உறுதியான கொள்கையை அறிவிக்கும் நிர்பந்தத்துக்கு மறைமாவட்டம் தள்ளப்பட்டிருக்கிறது .ஆலய நடைமுறைகளில் சாதிப் பாகுபாடு பார்ப்பவர் பாதிரியராக இருந்தாலும் அவர்கள் கத்தோலிக்க மதத்தில் நீடிக்க தகுதியில்லாதவர்கள் . அத்தகைய உறுதிப்பாட்டை மறைமாவட்ட நிர்வாகங்களும் ஆயர்களும் மறு உறுதிப்படுத்தவும் நடைமுறைப்படுத்தவும் இது ஒரு நல்ல தொடக்கமாக இருக்கட்டும் .தவறினால் ஆயராய் இருந்தாலும் சரி ..தன்னை கிறிஸ்தவன் என்று சொல்லிக்கொள்ளும் தார்மீகத் தகுதியை அவர்கள் இழக்கிறார்கள் என்பதே உண்மை கிறிஸ்தவர்களின் நம்பிக்கையாக இருக்க முடியும் .

"ஒரு உறையில் இரண்டு வாள் இருக்க முடியாது " என்ற பைபிள் வாசகப்படி ,சாதி மேலாண்மையை விரும்புபவர்கள் கத்தோலிக்க மதத்திலிருந்து வெளியேறுவதே கத்தோலிக்க மதத்துக்கு நல்லதாக இருக்கும் .

 

பின்னூட்டமொன்றை இடுக

Filed under எறையூர், கிறிஸ்தவர்கள், சாதி, வன்னியர்